Category Archives: ferrol

Xubílase un xornalista. Xermán Castro deixa a dirección do Diario de Ferrol once anos despois de comandar a (re)fundación do Diario, «un gran proyecto que salió zurrando duro con 35 páginas de información local. Cuando llegaron las presiones, sabíamos que éramos importantes en una ciudad difícil». Levaba case cincuenta anos na profesión, escribindo para El Ideal Gallego, Faro de Vigo, Ferrol Diario e La Voz de Galicia. Este sábado 23 recibirá unha homenaxe no Club de Prensa da cidade.

Escribo isto como nas últimas semanas o escribiron Vicente Araguas ou Moncho Veloso, cunha dose de emoción persoal, porque Man Castro foi o meu primeiro director, e aínda que só traballei un verán no Diario, foi moito o que aprendín nesa pequena redacción. Pero escríboo tamén porque cómpre realizar un acto de recoñecemento ao labor que nos últimos anos da ditadura e no proceso de consolidación do actual rexime deomcrático realizaron tantos profesionais, redactores, fotógrafos, impresores e directivos dos medios de comunicación. Cómpre facer, en xeral, un recoñecemento da profesión xornalística e de reivindicación da súa función social e da súa autonomía e capacidade de influencia, que tanto parece asustar ás propias empresas informativas e aos grandes poderes públicos e privados. Durante a Transición houbo un número moi importante de xornalistas galegos que exerceron a súa responsabilidade social, exercendo de voceiro da cidadanía e de defensores da democracia e da xustiza fronte ás forzas reaccionarias. Nun tempo como o actual, no que se quere reducir a figura do xornalista a transcritor de palabras doutros, a funcións de espello da realidade ou no que na procura dun falso ideal de obxectividade se quere eliminar a función mediadora do periodismo, cómpre homenaxear aos homes e mulleres que tanto pelexaron coa palabra impresa.

Cómpre homenaxear aos xornalistas traballadores e honestos coma Xermán Castro.